Општинскиот комитет на ВМРО ДПМНЕ од Тетово закажа протест пред општина Тетово денес во 18 часот пред зградата на општина Тетово поради енормното загадување на воздухот.
Мирниот протест е со цел да ја алармираме власта за здравствените проблеми со кои се соочуваат сите граѓани на општината поради енормното загадување на воздухот и нивното непревземање конкретни активности со цел ублажување или подобрување на квалитетот на воздух ко го дишеме како и да ги потсетиме за нереализираните ветувања и проекти за “Почист воздух” и “Воздух за сите”, велат од ОК ВМРО ДПМНЕ во повикот на социјалните мрежи.
Владата на Република Северна Македонија најави дека ќе ја одржи 165-та седница со почеток во 19:00 во зградата на општина Тетово. Претходно ќе има и министерски теренски активности.
Министрите за транспорт и врски и за економија, Горан Сугарски и Крешник Бектеши ќе направат увид во реконструкцијата на булевар „Видео Смилевски Бато“. Министерот Бектеши ќе ја посети компанијата „Федер Бау“. Министерот за здравство Венко Филипче ќе го посети Клиничкиот центар во Тетово. Министерката за труд и социјална политика, Мила Царовска и директорката на Агенцијата за вработување, Билјана Јовановска ќе ја посетат пекарата „Ремини“ корисник на мерките од оперативниот план за самовработување.
Оваа седница е втора во низата на седници кои ќе се одржуваат во различни региони во државата, со учество на градоначалниците од Полошкиот регион, од општините Тетово, Гостивар, Јегуновце, Врапчиште, Боговиње, Брвеница, Теарце и Желино.
