Анализата на сообраќајните прекршоци што во декември 2020 година ги направиле жителите на тетовско и за кои казни имаа изречено СВР Тетово покажува дека барем еднаш дневно се одземани на одреден временски период возачки и сообраќајни дозволи.
Возачки дозволи се одземаат за управување под дејство на алкохол како и на возач-почетник кој не се придржувач до законски ограничувања. Сообраќајните дозволи се одземаат за технички неисправно возило, неатестирани или неправилно поставени фолии на стаклата од возилото и за истечена регистрација до и над 30 дена.
-Во овој период времено биле одземени 30 возачки и 34 сообраќајни дозволи поради повеќе сообраќајни прекршоци. вели Марјан Јосифоски, портпарол на СВР Тетово.
Инаку во декември минатата година, полицајците од Полициска станица за безбедност на патниот сообраќај вкупно откриле и законски санкционирале 1205 различни видови сообраќајни прекршоци.
-Во редовни и акциски контролните активности, поради констатирани прекршоци, биле исклучени 69 возила. Најмногу од исклучените возила (57) имале истечена регистрација до и над 30 дена, додека кај 11 била утврдена техничка неисправност и кај 1 претовар. Минатиот месец, исто така, од сообраќај биле исклучени и 164 возачи, кои управувале без возачка дозвола, под дејство на алкохол, возачи-почетници, со несоодветна категорија и со важечка забрана за управување, потенцира полицискиот портпарол.
Пајак-службата вкупно подигнала 174 непрописно и погрешно паркирани возила.
А.С
