Огромно зголемување на бројот на заболени со Ковид-19 ако се споредуваат февруари и март во тетовскиот регион, според податоците на Министерството за здравство и Институтот за јавно здравје. Во март има 867 заболени додека во февруари имало 379 дијагностицирани. Во јануари имало 352 новозаболени.
Во моментот активно болни се водат 611 луѓе. Во текот на март поради Ковид-19 починале вкупно 21 човек од тетовскиот регион на возраст од 41 до 74 години. Покрај 867 лица кои биле дијагностицирани со Ковид-19, како оздравени се евидентирани 526 луѓе.
Доктор Светлана Трифуновска, координатор на матичните лекари во Тетово вели дека од друга страна се поголема е заинтересираноста за имунизација како втор начин на намалување на опасноста од заразување со Ковид-19 покрај веќе познатите мерки за заштита.
-Свесноста на луѓето многу порасна периодов, видоа дека се промени вирулентноста на вирусот, дека се промени патогеноста, дека се менуваат соеви на вирусот, брзата заразност, многу починати. Расте свеста и јасно е сите дека нема друг избор освен имунизација односно вакцинација. Мора да се оди на тие две мерки, внимавање, миење раце, маски и дистанца како и втората мерка имунизацијата, изјави Д-р Светлана Трифуновска.
Во тетовскиот регион од почетокот на пандемијата вкупно 6329 лица биле дијагностицирани со Ковид-19. Вкупно починале 239 луѓе.
Ноември 2020 година останува како месец кога имало најмногу 1632 заболени од Ковид-19.
А.С
