Во училиштата и градинките во рамки на општина Тетово се евидентирани 31 заболено лице од Ковид-19, соопшти денес Кризниот штаб. Пред една недела штабот препорача а денес донесе одлука сите наставници кои вршат онлајн предавања тоа наместо од училиштата да го прават од дома.
-Во градинките „Младост“ во Тетово, воспитно-образовниот процес во моментов го посетуваат вкупно 312 деца, додека 3 воспитувачи се позитивни на Ковид-19 и се во домашна изолација. Во основните училишта 11 наставници и 5 ученици се позитивни на вирусот и како резултат на тоа, 5 одделенски групи се во изолација. Во средните училишта на општина Тетово, каде наставата се одвива од далечина, на 12 наставници им е дијагностициран позитивен ковид тест, информираа од Кризниот штаб.
Од таму потенцираа дека Тетово бележи врв на есенскиот бран со Ковид19, при што има зголемување на бројот на заразени.
-Многу е важно во наредниот период да покажеме висока одговорност и граѓанска свест.Предизвикот со кој се соочуваме бара да бидеме што е можно подисциплинирани, имајќи предвид дека ова не е единствената глобална здравствена криза со која се соочува целиот свет и ние. Новите мерки за заштита што доаѓаат од надлежните органи и кои сите мора да ги почитуваме без исклучок, истакна градоначалничката Теута Арифи.
А.С
