Вкупно откриени и законски санкционирани се 1681 различни видови неисправност, односно сообраќајни прекршоци во сите денови од јануари, евидентира службата за аналитика при СВР Тетово. При редовни, засилени и акциски контролни активности поради констатирани прекршоци, од сообраќај биле исклучени 49 возила како и 204 возачи.
-Најмногу од исклучените возила (41) имале истечена регистрација над 30 дена, кај 7 била утврдена техничка неисправност и кај 1 возило претовар. Кај 204 возачи, 120 управувале без возачка дозвола, 36 под дејство на алкохол, 35 возачи-почетници, 2 со несоодветна категорија и 11 со важечка забрана за управување, информира Марјан Јосифоски, портпарол на СВР Тетово.
Покрај тоа, во овој период времено биле одземени 54 возачки и 40 сообраќајни дозволи, додека тетовската „пајак-службата“ вкупно подигнала 147 непрописно, односно погрешно паркирани возила. Во јануари, исто така, времено се одземени се и 22 возила поради истечена регистрација повеќе од 6 месеци.
-Што се однесува,пак, до сообраќајните несреќи нивниот број минатиот месец изнесувал вкупно 65 и е за 7 помалку во споредба со минатогодишниот јануари.Во нив, значително помал е и бројот на загинати (1) и тешко и лесно повредени лица(33), вели портпаролот.
Четириесет и осум од несреќите биле во населено место, а 17 на оторен пат, додека најчести причини се неприлагодена брзина (22) и неправилно вршење на дејствие (21).На тетовските улици (32) и автопатот (21) се случиле најмногу од несреќите.
А.С
