Градоначалникот на Општина Тетово Биљал Касами информираше дека со стручни лица ја разгледуваат можноста за нова сообраќајница околу викенд населбата на Попова Шапка. Според објавата на општината, градоначалникот заедно со раководителите на секторите за урбанизам, зак омунални дејности, Општинскиот инспекторат, како и проектанти, инженери и геодети во саботата го разгледуваа местото каде е планирано да се отвори нов пат.
-Одблиску го видовме местото каде што е планирано да се отвори нов пат почнувајќи од влезот на Попова Шапка со што би се создал кружен тек и можност да има еднонасочен сообраќај за влез и излез не само во викендичките, туку и слободно движење до туристичкиот дел без пречки и во текот на зимата.Патот покрај викенд куќите ќе биде по сите потребни стандарди и ќе ги исполнува условите за сообраќај на автобуси за странските туристи, информира Биљал Касами.
Според градоначалникот во процедура е и деталниот урбанистички план за Попова Шапка.
-Ние како општина максимално ќе се заложиме овој план што поскоро да им биде достапен на заинтересираните граѓани. Заедно со општинскиот инспекторат извршивме увид и во новоградбите, и вреди да се нагласи дека за разлика од минатите години, годинава притисокот за градење дивоградби и обидот за узурпација на јавен имот е значително намален и лично им се заблагодарувам на граѓаните за нивната учтивост и разбирање, порача Касами.
Тетовскиот градоначалник упати апел до сите кои се заинтересирани за изградба на нови објекти да имаат трпение додека не се изготви деталниот урбанистички план и секој ќе може да изгради објект или викенд куќа согласно закон и правила, исполнувајќи ги сите стандарди.
ас
