Тетово има само четири булевари кои почнуваат или завршуваат несуштински на крстосници со двонасочни улици или има прекин на дел од коловозните ленти, па на тој начин тие места веќе долги години претставуваат таканаречени црни точки, каде има огромен сообраќаен метеж.
Исто така долго време траат најавите на локалните власти дека булеварите ќе се продолжат, односно пробиваат со цел да има подобра патна инфраструктура.
Минатото општинско раководство на крајот од мандатот го почна пробивањето на булеварот „Благоја Тоска“ кај болницата, но градежните работи прекинаа.
Сегашниот градоначалник тврди дека досега го надминувале нерешениот и наследен проблем со експропријација на имоти на три семејства каде треба да помине трасата од булеварот. Најавува дека месецов ќе продолжат градежните работи.
-Тоа што остана три граѓани кои не беа решени, иако претходната гарнитура имаше дадено изјава дека ги има решено сите проблеми со експропријација, ние се соочивме со три граѓани со три предмети кои не беа решени. Ги решивме и тие, и веќе е даден налог да се продолжат работите.Дадено е налог на компанијата да продолжи со работа. Пуштено е барање до полиција, до ЕВН, работата е во координација со сите овие фактори, изјави Биљал Касами.
Дека има потреба од повеќе улици и булевари говорат и искуствата на сообраќајната полиција. Лошата комбинација на малку улици и голем број возила резултира со постојаниот сообраќаен метеж и хаос низ градот.
-Имаме мала и тесна инфраструктура а голем број на регистрирани возила. Само илустративно околу 46 илјади возила регистрирани во 2021 година. Ако го земеме приливот на возила во летен период оние наши граѓани што доаѓаат од странство тогаш можете да претпоставите за каква гужва се работи, изјави Зоранчо Талев, командир на сообраќајна полиција
Булеварите „Илинденска“ и „Видое Смилевски Бато“ се пресечени со двонасочни улици и таka среде град завршуваат овие сообраќајници. Само булеварот Маршал Тито почнува или завршува соодветно во насока на автопатот кон Скопје.
