Даријан Сотировски, директор на Комисијата за односи со верските заедници и религиозни групи покрена постапки пред соодветни установи поради наметната обврска на семејствата во Тетово кои имаат починати од Ковид-19 да бидат погребувани само во нови гробни места, а не во семејните гробници. Тој вели се одлучил на ваков потег бидејќи таква обврска не постои со постоечките законски одредби и уредбите поради пандемијата и затоа што претставува нарушување на верските права и чувства.
-Како тетовчанец со споделена загриженост денес разговарав со министерот за транспорт и врски Благој Бочварски кого го информирав дека од нашата проверка околу закопот на починатите од Ковид 19 низ државата, за разлика од други градови во Тетово и Гостивар истиот се спроведува задолжително во нови гробни места, а не во семејните гробници со вековна семејна традиција. Побарав од министерот кој е надлежен за ова прашање рамноправен третман и ревидирање на истото. Министерот ме информираше дека таква одлука не е донесена и дека со почитување на протоколите за заштита погребалниот оператор може да го изврши закопот во семејниот гроб, изјави Даријан Сотировски.
Тој испратил пријави до соодветните инспекторати и Министерства.
-Денес испратив претставка и до Државниот комунален инспекторат и до Министерството за транспорт и врски со кои барам итно постапување. Министерството преку надлежниот инспекторат ќе бара од операторите да го овозможат ова право на граѓаните бидејќи се стекнале со лиценца, која покрај права, подразбира и обврски. Изразувам благодарност на министерот за разбирањето. Сметам дека траумите кои ги поминуваат семејствата се секако големи, па закоп на член на семејството на друго место во услови на изолирани посмртни останки со адекватен материјал е непотребно и предизвикува дополнителна вознемиреност, изјави Сотировски.
Писмено барање од негова страна за преиспитување на ова прашање на 4 ноември е испратено до Главниот координативен кризен штаб на Владата.
А.С
