На комисиска расправа за буџетот во 2021 година Александар Велјановски пратеникот на ВМРО ДПМНЕ од Тетово поднесе два амандамни со кои побара реализација на два проекти во тетовскиот регион, но и двата беа одбиени од владејачкото мнозинство. Првиот амандман беше за регулација на коритото на реката Вардар во должина од 7 километри за да се спречи излевање и поплави на домаќинствата и земјиштето во селата Јегуновце, Раотинце, Копанце, Туденце и Сиричино.
-Вардар целосно го има променето текот од своето природно корито и мора да се интервенира. Побарани се средства во висина од околу 6 милиони евра. На крајот ги потсетив колегите од СДСМ дека ветуваа дека ќе го блокираат проектот Панорамско тркало во Скопје и парите ќе ги пренаменат за регулација на коритото на Реката Вардар во должина од 7 километри. И покрај тоа што има готов проект, пратениците од коалицијата СДСМ и ДУИ гласаа против овој амандман. Со 8 гласа „против“ и 6 гласа „за“ амандманот не се усвои, изјави Александар Велјановски.
Со вториот амандман тој побара буџетски средства со цел да се постави систем за отпрашување за Југохром.
-Коалицијата СДС и ДУИ го одби и вториот мој амандман со кој се предвидува да се обезбедат средства за набавка на “Систем за отпрашување” за потребите на фабриката Југохром. Со овој систем Југохром нема повеќе да загадува и ќе може да се рестартира. За жал, лесно и брзо забораваат на предизборните ветувања, ветуваа дека ќе го рестартираат Југохром и во 2017 и во 2018 а денес веќе и заборавија што ветиле, истакна Велјановски.
Тој вели дека ќе поднесе уште амандмани во текот на расправата во Комисијата.
