Овие неколку денови од работната недела се очекува да се пуштат во функција ски-лифтовите на Попова Шапка и на тој начин да се овозможи да започне скијачката сезона на овој зимско-рекреативен центар, дознаваме од ЕЛЕМ Турс, државната компанија надлежна за скијачката инфраструктура и двата хотели „Попова Шапка“ и „Славија“. Сепак од таму потенцираат дека одвивањето на ски сезоната ќе биде во зависност од временските услови.
-Скијачната сезона најмногу зависи од временските прилики. Со специјалните возила „ратраци“ е поминато врз патеките и снегот е оспособен за скијање. Во функција ќе бидат пуштени двете жичници „Церипашина“ и „Свети Илија“ како и ски-лифтовите „Аеродром“ и „Ге“. Новата шестоседа жичница нема да биде во употреба, истакнаа во телефонски разговор претставници на ЕЛЕМ Турс.
Сега нема да се издаваат нови сезонски карти за користење на ски-лифтовите и жичниците, а ќе може да се искористат билетите купени минатата сезона кои скијачите не ги користеа со оглед дека немаше снег и не работеа ски-лифтовите.
– Сезонските ски карти за употреба на жичниците и ски-лифтовите од ланската 2019/2020 сезона треба да се активираат во хотел „Попова Шапка“и ќе важат за оваа сезона. Нови сезонски карти нема да се издаваат, потенцираат надлежните од ЕЛЕМ Турс.
На 26 февруари година беше означен официјален почеток со работа на најновата шестоседна жичница на Попова Шапка долж патека од 1391 метри, која се минува со затворени кабини во кои има шест места.
ЕЛЕМ ТУРС подружница Попова Шапка Тетово, располага со два хотела „Попова Шапка” и „Славија” кои се наоѓаат на 1707 и 1780 м. надморска височина. Двата објекти имаат вкупен капацитет од 250 легла. Десетици сместувачки капацитети кои се во приватна сопственост исто така нудат повеќе опции и цени за ноќевања и оброци.
Регионалниот патен правец Тетово-Попова Шапка во должина од 18 километри беше целосно реконструиран во 2019 година.
А.С
