Пет години по ред се организираат работилници во Тетово за деца каде што тие може да ги стекнат основите на ликовното сликање, фотографирањето и филмот. Некои од децата ја засакале уметноста до толку што дури и се одлучиле да го продолжат и своето образование во оваа сфера. Оваа работилница се покажала како значајна основа за насочување на децата како ученици во средното образование.
-Дваесетина деца излегле од тука со голема заинтересираност да учат и практикуват уметност па како ученици се запишале во средното уметничко училиште. Двајца од нив се веќе се запишани и на Уметничката Академија, вели Славчо Максимовски, ликовен уметник.
Тој заедно со и Глигор Кондовски, кој е активен во сферата на филмот и фотографијата, ги обучуваат децата. Значајна е поддршката која ја добиваат од Музејот на тетовски крај и директорот Миќо Стојчевски, со оглед дека таму се одржуваат работилниците.
-Дечињата ги учат основите на ликовното сликање, а секоја година се реализира и годишна изложба од сите сработени дела. Часовите ги држиме во Музејот на тетовскиот крај, а последниот период на отворено заради ситуацијата со корона кризата. Децата ја истакнуваат својата креативност. Учиме различни техники за цртање и сликање за деца од различни возрасти, почнувајќи од 9 години па натаму, вели Славчо Максимовски.
Сите учесници на работилницата учествуваат и организираат годишна изложба. Во септември годинава дел од децата се претставија и на изложба на слики со православна тематика која беше дел од фестивалот на духовна музика ТЕХО.
А.С
