КОВИД центарот при тетовската болница нема добиено информации до денес за постоење на британскиот сој на коронавирусот меѓу заболените во регионот на Тетово, информираат од оваа јавна здравствена установа. Според координаторот во Ковид-центарот, д-р Гзим Нуредини брисеви се пратени во соодветна лабораторија на Македонската академија за науки и уметности (МАНУ).
-За постоење на британски сој немаме се уште таква информација од МАНУ, а имаме пратено брисеви таму и чекаме од нив да не информираат. Во случај да има ќе не информираат веднаш. Но сите овие мерки важат за сите видови Ковид-19. Сега има информации дека тој сој за 10 пати е позаразен и плус и подраматична клиничка слика има, со проливи повеќе, со гастроинтестинални симптоми. Значи сој со кој треба да сме претпазливи, изјави Нуредини.
Во саботата во Скопје вакцинирани се вработени лекари и медицински сестри од клиничка болница Тетово кои се најизложени и работат со КОВИД-19 пациенти.
-Имавме етапно вакцинирање за вработени од црвена фаза кои дејствуваат во ткн. „црвена зона“ директно работа со Ковид пациенти. Во сабота 53 вработени се вакцинирани во Скопје, има и такви кои не сакале да бидат вакцинирани. Следува вакцинација и на здравствени работници од ткн. портокалова фаза, рече докторот.
Во тетовската болница сега има 14 хоспитализирани пациенти со КОВИД-19. Од нив 8 се во потешка здравстена состојба.
-Голем број од нив се со други болести со шеќер, хипертнзија, белодробни болести, мултидисциплинарниот пристап е неопходен. Амбулантски прегледи имаме околу 35-40 дневно, не е намалена бројка, новозаболени според бројките на Институт за јавно здравје е околу 10 до 20 дневно. Да не бидат скептици луѓето за вакцинација, да не се плашат и да ја прифатат како начин да се избориме со болеста, изјави докторот.
Монтажната модуларна болница за ковид пациенти е готова и според докторот остануваат уште некои административни процедури пред да се пушти во употреба.
А.С
