Тетово е на врвот на листата на општини со долгови кон разни доверители евидентирана од Министерството за финансии, заклучно со третиот квартал од 2020-та, наведуваат авторките на дванаесетта истражувачка сторија во рамки на проектот „Заедно во борба против корупцијата“, финансиран и поддржан од Делегација на Европската Унија. До септември 2020 долгот на Општина Тетово изнесува 9.4 милиони евра.
-Дури 70 од вкупно 80 општини во земјава пријавиле доспеани, а неплатени обврски по различни основи. Ова значи дека 87,5% од сите општини во земјава се соочуваат со финансиски проблеми за редовно сервисирање на обврските. Во третиот квартал од годинава доспеаните, а неплатени обврски на сите општини во земјава изнесуваа 63.892.100 евра. Споредбената анализа во однос на состојбата со вториот квартал покажува раст на неплатените обврски за 13 милиони евра, се вели во истражувањето.
