Дваесет и седум годишен жилте на Селце, тетовско е приведен откако денес кај него се најдени над 9 илјади парчиња пиротехнички средства и петарди во неговото возило, информира СВР Тетово. Тој е приведен кај тетовската пошта.
-Денеска во СВР Тетово, од страна на полициски службеници од Одделението за криминалистичка полиција и СВР Тетово, лишен е од слобода Љ.А.(27) од с.Селце. При преземање мерки и активности од страна на полициски службеници во 13.40 часот пред поштата во Тетово е затекнато патничко возило „форд фиеста“, со тетовски регистарски ознаки, паркирано од приведениот и при преглед во него се пронајдени 9.163 парчиња на различни пиротехнички средства и 87 ракети, сместени во багажникот и во задното седиште, информираше портпаролот на СВР Тетово, Марјан Јосифоски.
Ова е трето приведување на лица во тетовско кај кои се најдено поголеми количини на пиротехнички средства и петарди. На 16 декември беа приведени двајца со над 2000 парчиња, а потоа уште едно лице со околу 1000.
Согласно члeн 31 од Законот за прекршоци против јавниот ред и мир е предвидена глоба од 200 до 500 евра во денарска противвредност. Дистрибуирање на пазарот во поголеми количини на пиротехника е спротивно на Кривичниот законик и за тоа дело е предвидена казна затвор три до пет години.
А.С
