Дејан Ангелоски од Охрид за два часа 19 минути и 36 секунди успеа да истрча од Попова Шапка до Титов врв и назад и да биде победник на вчерашната трка во скајранинг – екстремна форма на планинско трчање. Второ место го освои Александар Кирковски од Скопје со време од два часа 40 минути и 45 секунди, а третиот Никола Илиевски со време од 2:44:20. Првакот Ангеловски со овој резултат го сруши сопствениот рекорд од 2020 кој изнесуваше два часа и 39 минути.
Во женска конкуренција победи Елена Ртоска од Прилеп со време од три часа 6 минути и 51 секунда што исто така претставува рекорд. Сања Најдовски со три часа 25 минути беше втора, додека Снежана Џуриќ со три часа 33 минути и 47 секунди. И Ртоска во 2020 го имале рекордот од три часа и 43 минути.
Планинарскиот клуб „Македон“ од Скопје и Федерацијата на планинарски спортови беа организатори на оваа трета по ред трка за скајранинг – екстремна форма на планинско трчање.
Од Тетово учествуваше Александар Симјановски, со освоено 21 место со време од три часа, 22 минути и 56 секунди.
Трката почна на Попова Шапка кај манастирскиот комплекс на 1750 метри надморска височина преку Церипашина, до врвот Антени 2500 метри, врвот Бакардан и на крај Титов врв.
-Карактеристика на патеката се 20 километри должина вкупно во два правци и 2000 метри денивелација искачување и спуштање. Не мора да се трча цело време, дури и првите не трчаат цело време. Пример Церипашина е многу стрмен успон и мора да се премине на брзо одење. Но времињата кои се постигнуваат се прилично сериозни и импресивно во планинарските кругови. Во летни услови на едно просечно подготвен планинар до Титов врв му требаат и да се врати околу 9 часа., велат од ПК „Македон“.
Учесниците на ваква трка треба да имаат големо планинарско искуство, специјална опрема со себе како што е јакна против ветер, фолија за заштита од студ, соодветна количина на течности, храна и друго.
– Попатно има две освежителни точки една е на Антени на 2500 мнв, а втората е под Титов врв. Таму секој натпреварувач има на располагање по пола литар течност и грицки, додека останатото сам го носи. На Титов врв има контролор кој го регистрира нивното доаѓање и се враќаат назад и финишираат кај манастирскиот комплекс. Самото стартно бројче има чип се времето и се отчитува на финишот, објаснуваат од планинарскиот комплекс „Македон“.
Во соработка со Федерацијата на планинарски спортови, која е полноправен член на Светската скајранинг федерација, оваа трка претставуваше и државно првенство на Македонија во скајранинг за 2021 година. Во 2019 година македонска репрезентација во скајранинг за првпат настапи на европско првенство во Италија, а оваа година целта е настап на светското првенство кое ќе се одржи во месец јули на Пиринеите во Шпанија.
А.С
