Тетовската полиција информира дека за време на инцидентите на вчерашниот фудбалски дуел меѓу Шкендија и Шкупи на градскиот стадион имало едно приведено лице додека уште еден ќе биде повикан на разговор. Пред да почне фудбалскиот дуел како и за време на натпреварот имаше серија на инциденти со физички напади, фрлени камења врз фудбалери и судии, како и физички пресметки меѓу спортистите.
-На Грaдскиот стадион во Тетово полициски службеници од СВР Тетово го привеле А.И. (25) од с.Пршовце, тетовско, а службен разговор ќе биде извршен и со Д.А. од с.Шемшово, тетовско, поради недолично однесување на спортски натпревар, односно недозволено влегување во натпреварувачки простор за време на одржување на фудбалски натпревар. Според пријавеното, за време на натпреварот биле регистрирани прекршувања на правилата за навивање со палење на пиротехнички материјали и фрлање предмети, при што бил повреден еден играч кому му била укажана лекарска помош во приватна медицинска установа во Тетово, информираат од СВР Тетово.
По целосно документирање на случајот ќе бидат изготвени соодветни поднесоци, велат од полицијата.
