Општина Тетово информираше дека е започната постапката за чистење на реката Пена во градот од насобраните отпадоци. За спроведување на оваа активност според податоците за јавни набавки е ангажирана фирма од Порој, а договорот предвидува исплата на не повеќе од 2 милиони денари.
-Започна чистењето на коритото на реката Пена во делот од мостот на булеварот Индустриска (Видео Смилевски-Бато) па до магистралниот пат Скопје-Гостивар (обиколница на Тетово). Да ја зачуваме и да ја одржиме чиста животната средина, соопштија од Општина Тетово,
Според податоците објавени на електронскиот систем за јавни набавки набавки (ЕСЈН) за чистење на речните корита на река Пена, како и реките во Голема и Мала Речица и реката во Порој на 29 јули 2020 година Општина Тетово има склучено договор по претходно спроведена јавна набвака 06565/2020 со фирма од Порој.
-Вкупната вредност на договорот не смее да ја надмине сумата од 2 милиони денари без пресметан ддв. Договорот не го обврзува договорниот орган да ја изврши набавката во целиот горенаведен износ. Цената за услугите преземена од извештајот од спроведена постапка во која носителот на набавката понудил најниска цена (збирна цена од единечни цени) во износ од 3100 денари без пресметан ДДВ, се наведува во договорот кој е објавен на ЕСЈН.
Во документот е наведено дека времетраење на договорот е 12 месеци, а носителот на набавката е должен да го изврши предметот на договорот во рок од 30 дена сметано од денот на добивање на налог за работа.
Мониторингот на оваа јавна набавка е направен во рамки на проектот „Анализа на јавните набавки во Полошки плански регион“ спроведуван од страна на невладината организација „Младинска Алијанса“ и „Тетово инфо“.
Овој текст е изработен во рамки на проектот „Граѓански организации и Медиуми против корупција-Коалиција за нулта толеранција”. Изработката на текстот е со финансиска поддршка од Европската Унија. За содржината на публикацијата единствено се одговорни Младинска Алијанса-Тетово и Тетово Инфо и таа не мора да ги одразува гледиштата на Европската Унија.
