СВР Тетово информира дека во изминатото полугодие од 2022 година на поширокото тетовско подрачје вкупно биле изречени 3450 мерки за неприлагодена брзина, односно за движење со поголема брзина од максимално дозволената, претежно на автопатот Гостивар-Тетово-Скопје, на тетовските улици, но и на другите регионални сообраќајници на подрачјето.
Покрај тоа, во овој период изречени се, исто така, и 905 мерки за управување на возилата без положен возачки испит и валидна дозвола за тоа или 104 повеќе во споредба со истиот период лани.
-Во првите шест месеци од годинава евидентирани се и 726 мерки за недавање предност на пешаци, како и 148 мерки за користење на затемнети стакла и 287 мерки на возачи-почетници кои не се придржувале на законските ограничувања предвидени за оваа категорија учесници во сообраќајот, информира портпаролот Марјан Јосифоски.
Овие и другите мерки заокружени се со соодветни поднесоци и со парични глоби, кои зависно од видот и карактерот на прекршокот, согласно Законот за безбедност на сообраќајот и Законот за возила се движат од 45 до 400 евра во денарска противвредност.
