Здружението на Срби и Македонци КУД „Бранко Чајка“ Тетово на 9 февруари гостуваше на првата манифестација „Денови на традицијата и културата на дијаспората во Ниш – Роду у походе“. Организатор на настанот е Центарот за традиционална култура и духовност „Вук Стефановиќ – Караџиќ“ од Ниш.
Целта на манифестацијата, според зборовите на раководителот на Центарот, господинот Миљко Петровиќ е поврзување и зедничко делување на полето на негувањето и чувањето на српската култура, обичаите, јазикот и националниот идентитет кај српската заедница во регионот и дијаспората.
На манифестацијата, покрај Здружението од Тетово, како представници од Северна Македонија, настапија членови на Културно-уметнички друштва и ансамбли од Подгорица, Будимпешта, Источно Сараево како и домаќините. На сцената на Народниот театар во Ниш, преку видео материјал, беше проследен настапот на две фолклорни друштва од Канада.
Манифестацијата траеше два дена. Првиот ден се одржа промоција на две книги од областа на фолклорот и ревија на народни носии. Вториот ден, за учесниците, беше организирана прошетка низ градот и прием кај градоначалникот во Градската куќа во Ниш. Ова е прва ваква манифестација која се организира во Ниш, со желба на организаторот, истата да стане традиционална.
На почетокот на март, Здружението ќе учествува на фолклорна средба на друштва кои го негуваат српскиот фолклор во Инсбрук, Австрија, соопштија од Здружение на Срби и Македонци КУД „Бранко Чајка“ Тетово
