Неделава Локалниот младински совет при општина Тетово избра ново раководство и започна со спроведување на активностите, откако пред еден месец во општинскиот Совет помина одлуката за конституирање. За претседател е избран Олти Есати, потретседател Ристе Савески и секретар Резеарта Самиу.
-Градот во кој младоста е пасивна слободно може да се смета за мртов. Најголем проблем што ги погодува младите од Тетово е нивниот недостаток на интерес да се вклучат во културни или социјални активности, изјави Олти Есати.
Потпретседателот Ристе Савески истакна дека се надева младите заеднички ќе постигнат подобри нешта за нив со оглед дека во Советот членуваат лица од повеќе здруженија, организации, студентските парламенти и политичките подмладоци.
-Заедничко е намерата за надминување на проблемите на младите, поточно да има единствено дејствување. Ние како тело ќе работиме да има помалку насилство меѓу младите, а повеќе заедништво, што е симболот на Тетово, вели Савески.
Советот ќе има канцеларија во зградата на општина Тетово и ќе добива нивна поддршка. Работна стратегија за дејствување на младинскиот совет беше изработена од здружението „Мултикултура“.
