Центарот за еднакви можности „Бубамара“ денеска на плоштадот во Тетово ја организираше изложбата „Изложба без име“ при што се изложени илустрации направени од вознемирувачки пораки кои девојки ги добивале преку интернет. Ова е втора ваква изложба, по првата која беше претставена лани во октомври, во рамки на кампањата на „Бубамара“ чија цел е да се мотивираат и охрабрат жените и девојките да пријавуваат малтретирањето и сексуално вознемирување со кои се соочуваат во социјалните медиуми.
– Оваа година мислевме да направиме нешто преку илустрации да кажеме или да ги пренесеме дел од пораките за онлајн вознемирување, колку сериозно е ова како тема и дека полицијата треба да го сфати така. Искуството за една година е дека девојките немаат доверба во институциите и најчесто е тоа причината за тоа што не не пријавуваат во полиција. Ние преку оваа кампања и изложба сакаме да ги мотивираме и да кажеме на девојките дека ова не е нормално и мора да го пријаваат секое вознемирување и на тој начин да направиме полицијата да ги сфати сериозно и да реагира, изјави Рита Бехадини претседателка на „Бубамара“.
Се повеќе девојки се јавуваат во оваа невладина организација за да дознаат што треба да направат доколку се соочат со вознемирување на социјалните мрежи.
-Повеќе не прашуваат како треба реагираат и што треба да направат. Ама полицијата не реагира. Имаме случај во Кичево каде еден човек ги вознемирува онлајн и праќа различни пораки и тие пријавиле во полиција но немаат одговор што се случило со неговото пријавување во полиција. Така што навистина мислиме дека ова полицијата не го сфаќа сериозно, а треба да го сфати сериозно затоа што е реалноста на многу девојки во нашата земја, изјави Рита Бехадини.
Во рамки на кампањата на „Бубамара“ до јули ќе се одржат и работилници на истата тема. На нивната интернет платформа се пишуваат теми за онлајн вознемирување.
ас
