Учениците од основното училиште „Симче Настовски“ во тетовска Вратница во иднина ќе можат да користат 22 музички инструменти кои се добиени како донација од иселениците во Соединетите Американски Држави. Донацијата се реализира со ангажманот на поранешниот директор Бошко Стојчевски.
-Добротворниот клуб при црквата „Света Богородица“ од Детроит, Соединетите Американски Држави испрати 22 музички инструменти за учениците од нашето училиште. Голема благодарност за нашите иселеници од Вратница Душан Синадиноски, Борче Силјановски и Коце Михајловиќ, како и американецот Џеф Кембел од добротворната организација „Гладни за музика“ кои ја се ангажирале за донацијата., информираат од училиштето.
Во училиштето пристигнаа 6 виолини, 4 труби, 5 кларинети 2 саксофони, 4 флејти и еден барабан со вкупна вредност од 12 илјади долари.
-Музичките инструменти ќе ни помогнат учениците да се запознаат со музичка култура. Нашите заложби се да се направи летен музички камп како и да се формира и истурена музичка паралелка на музичкото училиште, истакнуваат од раководството на училиштето.
Дијаспората, односно иселените од Вратница во САД и порано донирале за училиштетот. Детското игралиште во дворот е формирано со помош на иселеникот Мирослав Гавриловски.
А.С
