Двојно повеќе луѓе се наоѓаат на болничко лекување во тетовскиот Ковид-центар, а лекарите велат дека состојбата е алармантна поради невнимание на луѓето и ширење на коронавирусот. Ако на 9-ти март имало само 23 лица на болничко лекување, денес еден месец подоцна има 48. Координаторот во Ковид центарот Д-р Гзим Нуредини вели дека овие две-три недели се случило енормното зголемување на бројот на заболени и хоспитализирани.
-Според епидемиолозите пикот се чека некаде после 20-ти април и тоа укажува дека следните денови ќе имаме уште поголем број на пациенти и хоспитализирани. Така да ќе треба многу внимателно да се постапува од страна на граѓаните околу мерките како заштита и мерки во болниците.Секој пат кажуваме дека болеста е смртоносна. Дека нема за таа специфична терапија. Ние овде имаме само терапија за поддршка, антибиотици даваме при супер инфекции и кислород што е терапија како симптомска. Специфична терапија нема, рече Нуредини.
Се уште постои несовесност кај дел од граѓаните, се кријат контакти и дека има заболени.
-Гледам дека некои ги кријат контактите кога им се јавуваат од службите, од полиција или од санитарна инспекција. Имам информации од колеги дека луѓе не се ни пријавуваат за да избегнат изолација. Тоа е многу ризично, кога имаме британски сој кој мноогу брзо се шири. За кратко време многу луѓе можат да бидат заразени, , рече д-р Нуредини.
Скоро сите хоспитализирани се во тешка здравствена состојба.
-Има пациенти со коморбидитети со срцеви болести, со хронични и други болести но има и без коморбидитети. Овие со коморбидитети се во тешка здравствена состојба и сите се со кислородна поддршка. Ако оди вака пак ќе треба реорганизација ќе треба не само кадар и технички персонал туку и просторија друга. Сега се полни тие два спрата од Интерно и Инфективно како ковид центар. Во тек на денот можеме да отстапиме некои други соби во евентуално ако е потребно, рече докторот.
Во моментот има 12-13 легла слободни, а има соби каде автоматски може да се вклучи системот за кислород за Ковид пациенти.
А.С
