Кошаркарскиот клуб Тетекс од Тетово ги започна подготовките за новата сезона во Втората кошаркарска лига. Од вчера кошаркарите под раководство на тренерот Димитрија Вучески и директорот Славчо Марковски-Чаве започнаа со одржување на кондициони тренинзи на спортскиот центар во Тетово.
-Во новата сезона за нас нема да игра Мевљан Јонузи кој замина во МЗТ Скопје 2, додека во нашите редови се врати Михаил Ценовски, кој досега настапуваше за АВ Охрид. Воглавном тоа е истиот играчки кадар од лани само со овие промени. Лани освоивме четврто место во Втората лига, се надевам дека годинава ќе имаме добар резултат, изјави Славчо Марковски-Чаве.
На спортскиот центар во Тетово на отворено екипата ќе се подготвува во текот на наредните две недели. Потоа ќе започнат со тренирање во затворено во една од спортските сали во градот. Натпреварувањата во Втората лига започнуваат во текот на октомври.
