Претставата беше посебно доживување за најмладите вљубеници во театарот зашто приказната беше раскажана на разбирлив и интересен начин за да допре токму до најмладите.
„Многу сме среќни поради позитивниот прием кај публиката. Се потрудивме приказната да биде разбирлива за секого, но и визуелно да изгледа убаво со живописна и оригинална костимографија и сценографија, како и со соодветно осветлување и музика“, вели режисерот Владимир Јованоски.
Режисерот смета дека од „Трнорушка“ (Заспаната убавица) може да се научи за позитивните и негативните човекови особини.
„Ова е театарска претстава во која јасно е исцртана границата меѓу доброто и злото и вечната борба меѓу нив, претстава од која се учи дека добрината, храброста, упорноста и трпеливоста секогаш носат среќа во животот“, смета Јованоски.
Интересот за претставата беше многу голем. Како што велат од Летечка театарска трупа, Тетово има долгогодишна театарска традиција, а публиката е секогаш жедна за театарски и воопшто културни збиднувања.
„Ќе се потрудиме оваа претстава да живее, како и повеќето претстави на Летечка театарска трупа. Би сакале да гостуваме во други театари низ земјава и да учествуваме на тетатарски фестивали, тоа ни се плановите“, додава режисерот Јованоски.
Театарската претстава „Трнорушка“ (Заспаната убавица) е поддржана од Министерството за култура на Република Северна Македонија.
Од Летечка театарска трупа велат дека во моментов интензивно се подготвуваат за уште една премиера на театарска претстава на почетокот на следниот месец.
