Во Тетово во соборниот храм Свети Кирил и Методиј празникот Богојавление Водици се одбележа со празнична литургија и Богојавленски водосвет без одржување на традиционалното спуштање на осветениот крст во црковниот базен.
Пандемијата оваа година е причина базенот во црковниот двор да остане празен и покриен, па изостанаа познатите обиди на младите верници да го фатат осветениот крст.
Денес во внатрешноста на црквата празнична литургија и Богојавленски водосвет одржа отец Предраг Исаевски во сослужение со другите свештенослужители. Малкумината верници согласно традицијата за дома земаа од осветената вода за која се верува дека го помага здравјето.
-Кога Господ Исус наврши триесет години од телесното раѓање, го започна Својот учителски и спасителен подвиг. И самиот почеток на тоа го означи со примањето Крштение на Јордан. Како што вели Свети Кирил Ерусалимски: „Почеток на светот е водата, почеток на Евангелието е Јордан“, порача отецот во обраќањето до верниците по литургијата.
Тетовско-гостиварскиот митрополит г. Јосиф, по повод Богојавление Водици богослужеше света литургија и проповедаше во соборниот храм Пресвета Богородица во Гостивар.
