Документарниот филм „Медена земја“ на режисерите Тамара Котевска и Љубомир Стефанов беше прогласен за најдобар филм на 8-то издание на Тетовскиот интернационален филсмки фестивал ОДА. Наградата ја подигнаа снимателите на филмот Фејми Даут и Самир Љума.
-Драго ми е што со филмот се прикажа тука во Тетово, каде беа моите филмски почетоци во драмското студио. Штета што и Атиџе од филмот не беше тука да ја сподели радоста за наградата, рече Самир Љума, кој е роден и живеел во Тетово.
-Драго ми е што наградата доаѓа од фестивал од нашата земја. Видовме прекрасни реакции од публика што дава впечаток колку длабоко продре филмот во вас, рече Фејми Даут.
Жирито на ТИФФ „ОДА“ наградата за најдобро сценарио му ја додели на Стефан Командарев и Симеон Венциславов од Бугарија за филмот „Рунди“. За најдобри актери беа прогласени Куштрим Хоџа (филмот „Студен ноември“) и Адриана Матоши („Куќата на агата“) како и победниците по категории.
На овогодинешното осмо издание на Тетовскиот интернационален филмски фестивал „ОДА“ кој се одржуваше од 7 октомври беа прикажани вкупно 105 филмови од 23 земји.
