Проблемите со ветото од Бугарија, според министерот за внатрешни работи Оливер Спасовски не може да биде причина за нарушување на безбедносната состојба во земјата. Министерот кој беше во тетовско Жеровјане денес пред новинарите истакна дека македонскиот јазик и македонскиот идентитет се нешто за кое никој нема право и не разговара во ниту еден момент, за тоа не може да се разговара.
-Нарушување на безбедносната состојба во државата нема и не може да има, нема никакви индиции заради тоа што институциите на државата функционираат нормално и сите елементи од безбедносниот сектор се насочени кон тоа да го зачуваме мирот и безбедноста на граѓаните. Мирот и безбедноста, исто како здравјето и животот, немаат цена. Што се однесува до преговорите, ние како Влада правиме сѐ, правиме напори на принципиелна основа постигнеме компромис во отворените прашања. Ние остануваме посветени на нашиот европски пат и ќе направиме сѐ да ги реализираме овие наши евроаспирации. Како Влада во изминативе години покажавме дека знаеме и да решиме прашања, знаеме да затвориме тешки прашања, знаеме да ги отвориме перспективите за граѓаните, меѓутоа тоа треба да биде на принципиелна основа, на почитување едни со други, на помирување и тоа се принципите на кои ќе мора да работиме и понатаму, изјави Спасовски по увидот на полициската станица во Жеровјане која беше обновена.
Тој повтори, согласно ставот на Владата дека за идентитетските прашање не се разговарало и не се разговара.
-Јас реков покажавме дека во изминативе три години дека сме подготвени на компромиси. Компромиси кои се на принципиелна основа но, компромиси не може да има за ништо друго освен за тоа дека треба да се помириме и да ја гледаме нашата перспектива во иднина. Историјата ќе ја оставиме на историчарите и тие нека разговараат за тоа што се случувало во минатото, ама не смеем,е да останеме заробени во минатото туку треба да гледаме во иднината. Македонскиот јазик, македонскиот идентитет се нешто за кое никој нема право и не разговара во ниту еден момент. Може да разговараме за сите други прашања кои претставуваат некаков интерес, но не и за прашањата кои претставуваат наш идентитет и наш јазик“ потенцира министерот Спасовски.
Министерот заедно со повеќе други функционери при МВР престојуваа во полициската станица Жеровјане за да го видат новиот изглед по целосната реконструкција.
