Навивачката група Војводи од Тетово со соопштение ја поздрави иницијативата на претседателот Пендаровски но порача дека нема да преговара со анти-македонски групи. Потенцираат дека станува збор за групи кои на своите трибини го палат македонското знаме.
-И ние, како и нашите браќа Комити, ја поздравуваме оваа иницијатива на Претседателот, меѓутоа денеска прочитавме став на Претседателот дека целта е помирување на навивачките групи во Македонија. И сега се прашуваме, за какво помирување ќе зборуваме ??? Дали се свесни колку македонска крв е пролеана изминативе години ? Дали знаат колку наши припадници се нападнати со тврди предмети, ножеви и слично? Раните од убиството на Саздо се сеуште свежи…
Нема една мирна година каде што нема да заплаче некоја мајка македонска.Ние како навивачка група Војводи имаме свои кодекс и нашиот став околу кодексите е едногласен и непроменлив. Ние НИКОГАШ нема да преговараме со група која работи против македонските интереси, група која не ја признава оваа држава, група која не го почитува Уставот, група која има анти – македонски ставови и група која на своја трибина го пали македонското знаме, се наведува во соопштението.
Воедно за навивачка група Војводи од Тетово проблематично е името Северна Македонија.
– Ние не ја признаваме Северна Македонија, поточно за нас оваа држава секогаш ќе биде Република Македонија.Ние се бориме за унитарна Македонија. – Се оградуваме од политички влијанија и контакти со политички лица бидејќи ние се бориме за нашите интереси, сепак ние сме навивачи, а не политичари, велат тетовските навивачи.
Во пост скриптум на соопштението велат : И како македонски граѓани имаме барање до Претседателот Стево Пендаровски. На неговата средба со балисти и шверцери да им постави прашање: на следниот фудбалски натпревар помеѓу репрезентациите на Македонија и Косово наскоро, за кого ќе навиваат ?!
