Граѓаните на Тетово кои живеат во центарот на градот и во стариот дел како населбите Певчина и Поток изминативе недели секојдневно се соочуваат со повеќе часовни прекини во водоснабдувањето. Според жителите од овие места во градот прекините се во различни периоди од денот и траат по неколку часа.
-Секој ден има прекини, а вчера немавме цел ден вода од 10 часот па се до вечерта некаде во 19 часот. Прекините траат и по неколку часови. Некои имааат хидрофори па соседите одат кај нив да полнат вода, велат жителите на месноста Певчина дел од месната заедница „Иљо Антески-Смок“.
– Минатата недела секој ден имаше прекини, некој ден од по два-три часа, а еднаш околу пет часа немаше вода. Вчера и денес немаше прекини, велат жителите од улицата „Димо Гавроски-Кара“ во центарот на Тетово.
Во јавното комунално претријатие „Тетово“ велат дека количини вода не се проблем и нема рестрикции во водоснабдувањето.
-Вода за пиење има над 500 литри во секунда во водоводната мрежа, не е до недостаток. Нема ниту рестрикции во водоснабдувањето. Има реконструкции на три улици низ градот па поради изведување на градежните работи мора во одредени периоди да се допре водоснабдувањето, изјави Назиф Јашари од ЈКП Тетово.
Улиците „Јане Сандански“, „Гоце Делчев“ и „Благоја Тоска“ се делниците каде се изведуваат реконструкции, при што се работи и на подземната инфраструктура за водовод и канализација.
– Четири пати се пукнати водоводните цевки во овие два месеци од кога трае реконструкцијата на улицата „Гоце Делчев“. Барем кај нас тоа е причина за подолги часови во прекин во водоснабдуавњето. Како што гледам само тројца работници работат на реконструкцијата и тоа се одолговлекува. Одвај чекавме да се обнови улицата, ама долго време имаме проблеми со паркирање, не може да донесеме огревни дрва и слични проблеми поради непристапност, велат жителите од улицата „Гоце Делчев“.
Во првите месеци од 2021 година неколку пати се јавуваше проблем во водоснабдувањето поради оштетување на цевководот од новиот водоснабдителен систем. Тетово се снабдуваше со вода само од стариот водовод, а имаше и воведени рестрикции кои во одредени денови достигнуваа и до 11 месеци.
ас
