Група граѓани и верници денес за прв пат се собраа во соборната црква Свети Кирил и Методиј во Тетово со цел да се востанови нова традиција на заедничко чествување на Василица-Православна нова година. Идејата е да се подели пита со паричка, а точно на пладне сите православни храмови да го одбележат денот и со биење на камбаните.
-Воведуваме нешто ново, но сакаме да стане традиција. Традицијата се создава преку народот, нешто што душевно ги храни, како што е токму денешниот ден, Православна Нова година, кога семејствата се собираат за питата со паричка. Ние на еден начин успеавме со благослов на владиката да чукнат сите камбани во православните храмови во тетовскиот крај почнувајќи од Сетоле до Фалише и нормално градот Тетово. Создаваме нешто ново а тоа е огласување дека постоиме на овие простори. Чувајте ја верата преку неа ги создаваме сите наши услови за живеење, нормално споделувајте љубов со другите и простувајте за да ви биде простено и вам, изјави Снежана Стојановска, дел од иницијативата.
Делови од питата кои се делеа зедоа сите присутни, а паричето се падна кај Зорица Јовановска од Тетово.
-Среќна сум што го добив паричето, некоја возбуда во мене се роди, најсреќно се чувствувам. Многу здравје и среќа во ова година за сите верници, порача Зорица Јовановска.
Повеќе децениски одбележување на Василица во Тетовско има во неколку села како Копанце, Милетино,Вратница. Група на маскирани учесници од утринските часови ги посетуваат домаќинствата, со исполнување на празнични песни и ора со цел да се истераат лошите духови од домовите на семејствата. Од домаќините добиваат дарови како топла ракија, грав, овошје и зеленчук.
ас
