Одборот на бранители денес во тетовско Теарце организираше одбележување на 20 години од загинувањето на полицаецот Момир Стојановски (29) при напад со ракетен фрлач врз полициската станица на 22 јануари 2001-та што се смета за почеток на оружениот конфликт во текот на годината. При нападот тешко ранет беше полицаецот Давор Евросимовски, а полесни повреди добија полицајците Борче Ѓуровски и Јахи Лика.
-Момир Стојановски е првиот непребол меѓу сите останати паднати бранители во 2001 година и секој збор е премалку да се искаже тагата што повеќе не е физички меѓу нас, но и секој збор е премалку да се искаже гордоста што секогаш ќе биде дел од нас и ова парче земја. И после 20 години ние бранителите и граѓаните се сеќаваме на настанот како да беше вчера, а болката кон загинатите не поминува и денес. Вечно ќе бидеме нивни должници. Најмалку што можеме да направиме за нив е да не дозволиме никогаш да заминат во заборав, истакна Марин Најдов од Одборот на бранителите.
Пред објектот каде порано беше полициската станица во Теарце, пред спомен плочата посветена на полицаецот Момир Стојановски беше положено цвеќе од претставници на СВР Тетово, Одборот на бранители и партијата ВМРО ДПМНЕ.
-Се одбележува 20 годишнина од почетокот на конфликтот, дојдовме за да оддадеме почит, да не дозволи споменот на овие настани да загине, бидејќи власта буквално се труди да уништи се што нешто значело за историјата на Македонија, за тоа дека луѓе гинеле за денешна Македонија,. Овде се едни од најсвежите болни рани од поновата македонска историја, за што ние имаме должноста никогаш да не се заборави, истакна пратеничката Дафина Стојановска од ВМРО ДПМНЕ, која на настанот беше со колегата Александар Велјановски.
Никола Савевски, доктор во пензија, со потекло од Теарце вели дека 20 години по настанот и конфликтната 2001 година, населението живее во мир.
-Тоа не се заборави, но од таа година од тој настан немало конфликти меѓу населението во Теарце меѓу етникумите, каде има Македонци, Албанци, Турци, Роми и Срби. Животот тече, нема замерки помеѓу народот, истакна Никола Савески.
За нападот на полициската станица во 2001 година одговорноста ја презеде ткн. Ослободителна народна армија (ОНА) по што започнаа повеќе оружени напади врз државните безбедносни сили.
А.С
