Општинскиот комитет на ВМРО ДПМНЕ од Тетово испрати соопштение до јавноста во која се осврнуваат на проблемот со непријатна миризба во градот од палење на смет.
-Деновиве тетовци се сведоци дека повторно се пали сметот на создадената дива депонија на излез од градот од каде се шири неподнослива миризба и чад. Оваа појава остава катастрофални последици по здравјето на жителите на град Тетово особено ако живеат во долниот дел од градот. Мора да се напомене дека покрај оваа мини депонија на неколку критични точки во градот нелегално се одлага сметот при што се создаваат мини депонии.
Граѓаните со право реагираат до ЈКП Тетово, почесто да ги празни контејнерите, бидејќи поради високите температури дополнително се шири неподнослива миризба, околу кој се собираат мачки, кучиња и инсекти кои пак стануваат извор на разни зарази. Бидејќи екологијата и здравата животна средина се на приоритетно место во програмите на сите политички партии, апелираме овој проблем во што е можно покус рок да биде решен, бидејќи нема калкулација со здравјето на луѓето. Ги повикуваме одговорните од Министерството за животна средина, како и локалните инспекциски органи да вршат зачестени контроли на критичните места со цел да се откријат и санкционираат прекршителите. Тетово не сака да биде меѓу најзагадените градови во светот. Тетово и тетовци сакаат чист воздух, се вели во соопштението на ОК ВМРО ДПМНЕ Тетово.
