Претставниците на Општина Тетово велат дека поради недобивање дозвола од МВР-СВР Тетово не можат да реализираат активности од културен-општествен карактер посветени на дијаспората кои сега доаѓаат во родниот крај. Тие предложиле до полицијата дел од булеварот „Илирија“ од кружниот тек кај пазарот до кружниот тек кај Центар за култура да биде навечер затворен за сообраќај за да биде шеталиште.
-Се обидовме да создадеме слободно движење барем додека трае вашиот престој тука, да го отвориме „Шеталиштето на дијаспората“,што ќе ви овозможи да уживате во вашиот град – Тетово, како што е традиција во секој модерен град. Изненадени сме што МВР, односно Секторот за внатрешни работи во Тетово, не дозволува да се реализира активност која е во целосна надлежност на локалната самоуправа, иако бевме сведоци дека во текот на изминатите години, за време на летниот период, не само овој булевар, туку и други улици беа затворени, блокирајќи цели населби, а тоа никогаш не му пречело на МВР. Ова не може поинаку да се објасни освен продолжување на носење одлуки со политичка заднина против општина Тетово и граѓаните, кои за жал овој пат ги таргетираат и исселениците, изјави Бесар Дурмиши, член на Комисија за спроведување на Тетовско културно лето.
Според Дурмиши од страна на Секторот за комунални дејности бил изготвен и основен сообраќаен проект за ограничување и забрана на движење на возила во вечерните часови почнувајќи од 01.07.2022 до 31.08. 2022 година согласно член 155 и 156 од Законот за безбедност во патниот сообраќај и бил пратен до СВР Тетово.
-Она што изненадува е фактот што по сите прелиминарни консултации и усни одобренија од претставници на МВР и законски обврски, одговорот е негативен. Ова ја оневозможува реализацијата на овој проект, кој ќе беше одлично прифатен од граѓаните, а особено од бизнисите концентрирани во овој дел од градот, знаејќи дека приходите од доаѓањето на иселениците е финансиска инекција за локалната економија. Ако оваа власт не знае да го почитува човечкиот аспект, барем очекувавме дека ќе го почитуваат материјалниот како што се навикнати, но за жал и во овој случај покажаа дека се нехуман, рече Дурмиши.
Од тетовската полиција преку соопштение објаснуваат дека барањето не се прифаќа поради долгиот временски период кој го бара Општина Тетово за измена на сообраќајниот режим на дел од булеварот „Маршал Тито“ („Илирија) во периодот од први јули до 31 август и во дневниот период од 20 часот до 01 часот наредниот ден.
-СВР Тетово го одбива ова барање и нема да го одобри истото, а за што ќе изготви и соодветно решение кое ќе биде испратено до барателот.Согласно член 347 став 1 од Законот за безбедност на сообраќајот на патиштата, објектите наменети за сообраќај (патишта, улици и друго) не можат да се пренаменат за други потреби и особено не толку долго време, информираа денес од СВР Тетово.
Општината планира настани и активности во областа на културата во периодот од 15 до 31 јули.
