Митрополитот тетовско-гостиварски г. Јосиф во сослужение на свештенослужители од тетовската епархија денес изврши осветување на ново поставените крстови на црквата “Свети Атанасиј” во тетовска Брвеница која се проширува. Крстовите се поставени на новата купола и камбанерија.
Во оваа црква во септември 2018 година започна проширување на објектот. Во изминатиов период се изградија дополнителни нови надворешни ѕидови лево, десно и напред пред вратата од црквата. Потоа се отвори кровот и се изгради купола и камбанерија кои што со лаци се поврзани со надворешните ѕидови.
-Идејата е да се добие поширок наос (место за верниците во црквата при богослужба). Понатаму во предниот дел се планира продавница за свеќи и сувернири, а десно крстилница. Сето ова ќе биде во склоп на целата црква. Откако ќе се заврши со црквата ќе се работи надвор на партнерно уредување, изградба на нов базен за Водици и летниковци, да се подобри зеленилото со што дворот значително ќе се видоизмени-изјави протејереј Ивица Спасеноски, старешина на црквата.
Целосното проширување е овозможено со помош на донациите од верниците. Во иднина ќе требаат средства за врати, за малтерисување и фрескоживописот и ентериерно уредување во внатрешноста на црквата, како плочки, лустери и друго.
