Откако денес претпладне тетовската полицијата им поднесе кривична пријава за насилство, судија во претходна постапка одлучил да им определи осум дена притвор на браќата за нападот врз лекарот во кожното одделение при Клиничка болница Тетово во петокот наутро. Според изворите во истрагата двајцата браќа веќе се однесени на издржување на мерката притвор во казнено поправната установа „Скопје“ во населбата Шуто Оризари во Скопје.
-Кривичната пријава за А.Б.(43) од тетовска Голема Речица и неговиот брат Л.Б.(40 ) од Тетово е поради основи на сомнение дека сториле кривично дело „насилство“, по член 386 став 3 во врска со став 1 од Кривичниот законик. Тие се сомничат дека на 6.9.2019 година, во периодот од 9 до 9 часот и 30 минути, на Одделението за кожни болести во тетовската клиничка болница, физички го нападнале лекарот А.Е.(45), соопшти денес СВР Тетово.
Двајцата браќа по нападот биле лишени од слобода и задржани во Полициската станица Тетово.
