И во вечерните часови пожарникарите работат на целосно ликвидирање на пожарот во Тетово , кој во текот на денот беше ставен под контрола и локализиран.
Огнот започна во големата управна зграда на поранешната фабрика „Македонија Табак“ и зафати два соседни објекти каде приватна фирма сега произведува и складира градежни материјали.
Пожарот беше ставен под контрола и локализиран само во управната зграда, додека на останатите два соседни објекти е целосно изгаснат.
-Огнот во текот на денот е локализиран и ставен под наша контрола.Сега вечерва уште има чад затоа што целата покривна конструкција од големата зграда изгоре и падна. Имаме големи количини на изгорени материјали кои тлеат и затоа се уште има чад и ќе има и во текот на вечерта. Затоа цела ноќ е предвидено да дежураме за да се избегне опасност повторно да се разгори огнот. Ова беше еден од најголемите пожари во мојата кариера и сме фрлиле неверојатно големи количини вода, изјави командантот на тетовската пожарна Ука Алити.
Пожарот утринава избувна околу 9 часот и 30 минути.
-Пожарот е под целосна контрола благодарение на силната интервенција на противпожарните единици од Тетово, Скопје, Куманово, Гостивар, Кавадарци, благодарение на армискиот и полицискиот хеликоптер, но и вработените и други граѓани кои помогнаа во пренесувањето на горливата материја со виљушкари, изјави Стојанче Ангелов, директор на ЦУК.
Според Ангелов испитување на воздухот направила единица на Армијата која анализира атомско-биолошка-хемиска опасност.
-Ннема опасни гасови во воздухот, отровни гасови. Извршија испитување на воздухот во околината и состојбата од аспект на отровни гасови е безбедна. За секој случај очекуваме дополнително испитување бидејќи има мала веројатност за отровни гасови која можеби нема можност да детектира, но потсетувам имаат врвна опрема од Америка, изјави Ангелов.
Двајца полесно повредени пожарникари, како и неколкумина кои вдишале чад се последиците по луѓето кои работеа на гасење во пожарот. Од Центарот за јавно здравје Тетово препорачаа болните лица и децата да не излегуваат од дома ако немаат потреба или да носат заштитна маска КН 95.
