Центарот за јавно здравје Тетово препорачува водата од градскиот водовод да не се користи периодов поради појава на заматување предизвикано од интензивните врнежи од дожд. Објаснуваат дека состојбата не е аларманта и дека по прекинување на врнежите се очекува стабилизирање на физичко-хемиските параметри.
-Поради обилните дождови најверојатно дојде до пробив до извориштата на Шар Планина и дојде до заматување на водата за пиење во градскиот водовод на Тетово. Поради тоа не ја препорачуваме да се пие водата, односно препорачуваме да се користи флаширана вода или да се преврира 10 минути водата а потоа со ладење да се употребува и да се користи. Првичните резултати се во рамки на нормални вредности . Нивото на резидуален хлор е 0,2 милиграми на литар, така да препорачуваме да не се консумира додека не излеземе со конечните резултати. Што значи нивото на резидуален хлор, ни дава надеж дека нема да дојде до микробиолошко загадување и дека ова ќе биде едно транзиторно заматување на водата за пиење, изјави доктор Ратко Давидовски, специјалист по хигиена и здравствена екологија во Центар за јавно здравје.
Тетово во моментот се снабдување со вода од 4-ти извори на Шар Планина и ткн. стар водоснабдителен систем. Новиот систем која зема вода од планинските реки кај месноста Лешница веќе неколку дена е вон функција исто така поради заматување на водата и затоа што сензорите на филтер станицата не дозволуваат проток на водата.
Стариот систем од извориштата на Шар Планина денес има зголемена количина и доток на вода во мрежата од 310 литри вода во секунда, кои во саботата биле 150. Тоа е амплитуда која се случува оддеднаш и ради дождовите и ќе се намали, информира Љуљзим Шаќири од ЈКП Тетово.
Четирите извори од стариот систем се Уливерички извор, Вакуф, Попова Шапка и Драга вода.
А.С
