Општина Тетово постави грпки (ткн. лежечки полицајци) од плочки на булеварот „Видое Смилевски-Бато“ попознат како „Индустриска улица, а целта според нив е подобрување на безбедноста на пешаците и да се овозможи намалување на брзината на возилата на оваа делница.
Освен грпките кои се на преминот за спореден влез во ОУ „Кирил и Методиј“ започнати се активности за поставување на ограда на средината од булеварот која треба да спречи преминување на коловозните ленти вон пешачките премини.
-Ова се прави со цел да се спречат несреќи кои честопати го загрозуваат животот на граѓаните. Ова е транзитен пат, овој дел од градот е густо населен,а има многу деца кои следат настава во основното училиште „Кирил и Методиј“. Во текот на следната недела, ќе поставиме и дополнителна вертикална сигнализација, а ќе ги обележиме и пешачките премини, се вели во известувањето од општина Тетово.
На 13 јануари шест годишно девојче го загуби животот отакако беше удрено од возило на овој булевар, по што на 25 јануари беше организиран и јавен протест на жителите и граѓаните кои бараа преземање итни мерки за да се спречат идни несреќи и поголема полициска контрола на сообраќајот.
Според СВР Тетово, во текот на минатата, 2020 година, на улица „Видоја Смилевски-Бато“ во Тетово регистрирани се, односно се случиле вкупно 50 сообраќајни несреќи, од кои 30 со повредени лица и 20 само со причинета материјална штета. Оваа делница е магистрална улица затоа што претставува приклучок на неколку улици кои водат кон регионален пат.
А.С
