Од вечерва во Лешочкиот манастирски комплекс започува тридневниот „Лешочки камерен музички фестивал“. Свеченото отворање на вториот по ред фестивал е од 19 часот, а концертите ќе се одржуваат во Духовно-културниот центар „Кирил Пејчиновиќ“.
Тридневната програма на фестивалот вечерва ја отвораат музичарките Богдана Бушевска на флејта и Горјана Стојановска на пијано. Утре на 7 мај ќе се одржи вечер на младите музички уметници Ангела Николовска на пијано и Александра Кировска на гитара. Фестивалот ќе заврши во недела 8 мај со концерт на Илза Бафтиари – виола и Шкељзен Бафтиари – пијано.
-Целта на овој фестивал е приближување на различни култури преку универзалниот јазик музиката како и промовирање на младите музички уметници од Полошкиот регион со едно гостување од странство. Воедно овој фестивал претставува и промоција на овој регион каде настаните од ваков вид се во многу мал број. Идејата за фестивалот на вакво необично и егзотично место тлееше во нас подолг период и среќни што лани успеавме за прв пат да го реализираме. Ова е тренд да има фестивали од особено културно значење и поврзување на заедници на необични локации долго време постои во европските земји, изјави Маја Шутевска Кировска, директорка на фестивалот.
Мото на фестивалот е „Зближување преку уметноста“, посебно на двете најголеми етнички заедници во овој регион.
ас
