Здружението на Срби и Македонци КУД „Бранко Чајка” од Тетово во сабота на 10 јули 2021 година, со почеток во 19:00 часот во големата сала на тетовскиот Центар за култура „Иљо Антевски-Смок“ ќе ја одржи третата манифестација „Фолклорни игри под Шара“.
Манифестацијата има мултиетнички карактер на која на едно место се претставува фолклорот на народите кои живеат во пазувите на Шар Планина – Македонци, Албанци, Срби, Бошњаци, Турци, Роми и други.
-На двете претходни изданија на манифестацијата својот фолклор го претставуваа културно-уметнички друштва кои работат во Тетово и околните населени места. Изминатиот период беше исклучително тежок за нормално работење на овие друштва, па поради тоа оваа година на програмата ќе земат учество три културно-уметнички друштва како и вокални и инструментални солисти: Тимко Чичаковски на канон, Ернес Ибраимовски, кој ќе исполни една ромска песна и вокалниот солист на Здружението Драгиша Аврамовски. Народната игра на Македонците и Србите ќе ја претстават членовите на домаќините, Здружението на Срби и Македонци КУД „Бранко Чајка“ од Тетово и КУД „Брвеница“ од Брвеница додека на Бошњаците КУД „Диванхана“ од Сарај. Албанскиот фолклор ќе биде претставен преку народната поезија во изведба на тетовскиот актер Бурхан Амити, изјави Соња Андонов, претседателка на Здружението.
Манифестацијата „Фолклорни игри под Шара“ претставува проект од национален интерес во културата за 2021 година на Министерството за култура на Република Северна Македонија од областа на фолклорната и музичко-сценската дејност.
А.С
