Прв состанок во 2021 година одржа кризниот штаб за справување со коронавирус при Општина Тетово, од каде потенцираат дека како и во целата земја има значително намалување на бројот на заболени и хоспитализирани. Сега во тетовската болница има 16 лица кои се лекуваат, додека од последниот состанок на штабот на 21 декември 2020 е објавено дека имало 36 луѓе на болничко лекување.
-Вкупниот број на заболени лица од почетокот на пандемијата до денес е 4870. Од оваа бројка досега се опоравиле 3985 лица, а 187 починале, со што бројот на активни случаи во Тетово и 5 околни општини е 698. Во Клиничката болница во Тетово, на одделот за инфектологија има вкупно 16 пациенти со умерена клиничка слика и на кислородна поддршка, изјави Теута Арифи, градоначалничка на Тетово.
Во текот на минатата недела, според статистиката на Секторот за внатрешни работи Тетово, во периодот од 25.12.2020 до 11.01.2021 година за неносење заштитни маски издадени се казни на вкупно 246 граѓани.
-Во овој период, Државниот санитарен и здравствен инспекторат во тетовскиот регион подготви нови решенија за изолација за 158 граѓани, додека со вакви решенија беа извршени проверки на 289 лица, информираше Арифи.
Во градинките „Младост“ една група е во домашна изолација.
А.С
