По една година пауза поради пандемијата годинава по повод православниот празник Богојавление Водици ќе се одржи чинот на спуштање на осветениот крст во тетовскиот соборен храм Свети Кирил и Методиј како и во други цркви. Во Тетово се празнува и утрешниот ден Водокрст, ден пред Водици.
Минатата година поради пандемијата празникот се одбележа со празнична литургија и Богојавленски водосвет без одржување на традиционалното спуштање на осветениот крст во црковниот базен.
-Празнувањето започнува со Утрена во 7 часот и Литургија во 8 часот. По завршување на литургијата и Богојавленски водосвет ќе се изврши чинот на спуштање на осветениот крст во базенот при соборната црква Свети Кирил и Методиј околу 9 часот и 30 минути, информира Тетовско-гостиварската епархија.
Богојавленските празници во Тетово започнуваат утре со одбележување на Водокрст, ден пред Водици во црквата Света Богородица. Таму исто така има Утрена од 7 часот и литургија од 8 часот, по што ќе се одржи и Богојавелски водосвет и спуштање на осветен крст во водите од црковниот базен околу 9 часот.
