Пред тетовската јавност вчера беше одржана промоција на книгата „Драга учителке- за животот и педагошката дејност на Анче Бојаџиева – Герасимовска“ од авторката Соња Андонов дипломиран музиколог и музичар-теоретичар, професор во Државното музичко училиште „Тодор Скаловски-Тетоец“ во Тетово.
Книгата претставува монографијата за Анче Бојаџиева Герасимовска, професор по пијано во пензија и долгогодишен педагог во Државното музичко училиште, родена во Тетово во 1935 година.
-Систематизирајќи ги своите музиколошки истражувања во книгата, Соња Андонов, прави серизони напори пред македонската културана јавност целосно да го претстави животниот и професионалниот живот на професорката Анче Бојаџиева-Герасимовска. Со овој музиколошки труд авторката го претставува и десјтвување на семеството Бојаџиеви чии поедини личности учествувале во развојот на музичкиот живот во Тетово и Републикава, истакна д-р Мирјана Павлоска-Шулајковска, рецензент на книгата.
Музичарот и филсмки режисер Глигор Кондовски во својата рецензија за книгата вели дека се зачувува споменот за пијанистичката школа во Тетово.
-Ние како читатели преку студиозните погледи на авторката го доживуваме некогашниот музички свет во градот Тетово, вели Кондовски.
-Анче Герасимовска е врвен музички педагог која со своите знаење, искуство, со своето мајчинско однесување со лесностија го пренесува на младите генерации. Несекојдневната трпеливост со децата, изнаоѓањето соодветна вежба за помалку талентираните, се карактеристики кои сведочат за трпеливоста, посветеноста, несебичноста и знаењето на професорката Анче Герасимовска, истакна во рецензијата новинарката Санда Србиновска.
Авторката на монографијата Соња Андонов истакна дека станала пијанист, но ја избрала музиката за животна професија благодарение на својата учителка Анче.
-Нејзини ученици денес работат како професори во основни и средни музички училишта, како и на факултети за музичка уметност. Покрај знаење, таа им ја разви првичната задача која секој музички педагог ја има, а тоа е развивање љубов кон музиката, вели авторот Соња Андонов.
Покрај таткото на Анче, Глигор, во монографијата се претставени и двата лика од нејзиното потесно семејство кои давле свој придонес во музичкиот живот на Македонија – братот Драган Бојаџиев, долгогодишен музички уредник во радио Скопје и неговата сопруга Соња Бојаџиева, професор и поранешен директор во МБУЦ „Илија Николовски – Луј“ во Скопје.
А.С
