Пред зградата на Општина Тетово вечерва беше организиран протестот насловен „Загадувањето убива кога власта е неспособна-Стоп за депониите“ во организација на ВМРО ДПМНЕ. Од таму побараа одговорност од властите поради немањето основни услови за живот во 21 век.
-Во моменти на пандемија која ги напаѓа претежно белите дробови, власта не осудува и казнува со нечист воздух. 21ви век, а ги немаме основните услови за живот, чиста вода и чист воздух. Некогашниот Мал Париз, урбанистички среден и зелен град познат по чисти улици, свеж воздух паркови, и чиста шарпланинска вода, денес уништен, угнетен, распарчен, загаден и осквернавен. Тетово денес наликува на постапокалиптичен град, истакна Ангел Карапетров, претседател на општинскиот комитет на ВМРО ДПМНЕ во Тетово.
Тој потенцираше дека Тетово денес е пример што се случува со едно општество кога постои корумпирана власт на чело на институциите која управува со ресурсите и животите на луѓето.
-Наместо решение за подобар живот добивме повеќе проблеми. Наместо светла иднина за нашите деца добивме пресуда за безнадежност. Но јас велам доста е! Наша должност е да се избориме за следните генерации. Ве повикувам сите, без разлика на верската и етничката припадност да се обединиме и да ставиме крај на ова лудило. Да ставиме крај на корупцијата, негрижата, криминалот. Време е да го вратиме сјајот на Тетово Време е да го вратиме епитетот Мал Париз. Доста е, рече Ангел Карапетров.
И минатата недела ВМРО ДПМНЕ организираше протест пред општинската зграда поради загадениот воздух.
А.С
