Тетовци кои живеат во Саат маало вчера одржаа заедничка еколошка акција за расчистување на нивниот парк. Тие покренаа и иницијатива „Пубоо“ (Поубаво) на социјалната мрежа Фејсбук, со идеја нивниот пример да го продолжат и другите сограѓани низ Тетово.
-Ние се собравме 20-тина маалци и го исчистивме паркот. Идејата е да заедно да придонесеме за поубаво наше маало. Чистата животна средина зависи од сите нас. Ние се собравме и ги собравме отпадоците и исчистивме зеленилото околу паркот, како и тротоарите и улиците. Побаравме од комуналното претријатие на крај да дојдат и да го измијат местото со вода, што беше направено од нивните страна, вели Драган Гавровски, еден од иницијаторите.
Иницијативата е со цел да се зголеми свеста и совесноста кај луѓето па и другите сограѓани да се приклучат во наредните акции во Саат маало. Исто така да се поттикнат и другите граѓаните од населбите низ Тетово да почнат со расчистување на сметот расфрлан низ нивните маала.
-Мора да се одржува и понатаму таа чиста средина како што секој од нас по дома редовно се грижи за чистотата и хигиената. Се надевам дека иницијативата ќе биде прифатена и од други маала и места низ градот, затоа што знаеме цело Тетово со колку многу расфрлан смет се соочува, рече Гавровски.
Саат маало е познато во Тетово и по својата мултикултурна слика. Тука свои домови имаат семејства од сите етнички заедници, а карактеристика е нивното заедништво и соживот.
