Тетовската полиција упатува апел до мотоциклистите повеќе да ги почитуваат законските обврски, воедно информирајќи дека поради зачестеното користење на овие возила за речиси 2 месеци се изречени 95 мерки.
– Со затоплувањето на времето и на тетовско-гостиварското подрачје се чувствува зголемено присуство на мотоциклисти, особено во доцните попладневни и вечерните часови. Затоа СВР Тетово ги засили контролите и изрече вкупно 95 мерки минатиот и овој месец. Најмногу од мерките се за некористење заштитна опрема, со напомена дека паричната глоба за овој вид прекршок изнесува 50 евра во денарска противвредност, вели портпаролот на СВР Тетово, Марјан Јосифоски.
Од Секторот за внатрешни работи Тетово со апел до мотоциклистите задолжително да поседуваат соодветни возачки дозволи, навреме да ги регистрираат мотоциклите и да користат заштитна опрема, пред се шлем (кацига).
-На мотоциклистите им се советува, исто така, да ја прилагодат брзината според условите на патот и да не се движат еден до друг, туку еден позади друг. Покрај ова, не смее да има превезување на мотоциклите на повеќе лица од законски дозволеното и без потребната опрема, потенцира Јосифоски.
А.С
