Секторот за внатрешни работи Тетово, покрај другите сообраќајни приоритети, овој и наредниот месец посебен акцент ќе им стави на мотоциклистите, а кои деновиве се проприсутни на тетовско-гостиварското подрачје.
Со цел нивна поголема безбедност повторно се апелира задолжително да ја поседуваат и носат пропишаната заштитна опрема и пред се заштитен шлем, односно кацига. Зашто, оние кои ги управуваат мотоциклите без ваква опрема ќе се соочат со соодветни поднесоци и парична глоба од 45 евра во денарска противвредност.
-До нив се апелира, исто така, навреме да ги регистрираат мотоциклите, бидејќи паричните глоби за истечена регистрација се движат од 100 до 500 евра, а доколку мотоциклите не се регистрирани повеќе од шест месеци предвидено е одземање на истите до 90 дена. Ако,пак, се управува без соодветна категорија глобата изнесува 250 евра во денарска противвредност. Секторот за внатрешни работи Тетово ги потсетува мотоциклистите да внимаваат на бучавоста што ја создаваат. Доколку се утврди поголема бучавост од дозволената, законски предвидено е одземање на мотоциклите, исто така, до 90 дена, вели портпаролот Марјан Јосифоски.
Полициските службеници на СВР Тетово веќе ги засилија планираните контролни активности кои во наредниот период уште повеќе ќе се интензивираат, како и контролните активности во чие средиште ќе бидат пешаците, односно како кон нив се однесуваат возачите, но и како тие се однесуваат во сообраќајот.
