Како што изминува декември се бележат и намалувања во бројките на заболени од Ковид-19 како и болничко лекување во Тетово. Во текот на изминатите три недели се бележи опаѓање за триесет отсто на новите случаи на заболени од Ковид-19 на подрачјето на тетовскиот регион. Неделава што измина од 14 декември до 20 декември се бележат 206 новозаболени додека изминатите две недели претходно имало 286 (7 до 13 декември) и 293(30 ноември-6 декември).
За денес се евидентирани 7 нови заболени, а 34 оздравени.
До утринава вкупно има 39 пациенти кои се на болничко лекување во тетовската клиничка болница и Ковид центарот. Најмногу досега имало 51 лице на болничко лекување.
-За нијанса е подобра состојбата изминатата недела. Викендов нема смртни случаи. Кај хоспитализираните пациенти бележиме опоравување, но има и такви кои се соочуваат со секундарни последици од Ковид-19 како што се проблеми со бели дробови, невролошки потешкотии, засилена коагулација и слично, изјави д-р Гзим Нуредини, координатор во Ковид-центарот.
Неделата што измина се бележат вкупно 9 смртни случаи на лица од 50 до 81 година. Денес нема нов случај на починато лице.
Кризниот штаб при општина Тетово по денешниот состанок сублимира дека се бележи значителна стабилизација во тетовскиот регион во справување со Ковид-19.
– Во споредба со изминатите 4 недели, епидемиолошката состојба бележи значителна стабилизација во однос на здравствениот третман на граѓаните кои во помал број бараат третман и здравствена заштита во Клиничкиот центар во Тетово. Министерството за здравство не информира дека ќе обезбеди средстава за финансиска поддршка за целиот медицински персонал во Клиничкиот центар во Тетово, кој неуморно и посветено досега даваа се од себе во битката против Ковид-19, изјави Теута Арифи, градоначалничка на Тетово.
Во детските градинки има 5 активни случаи и две групи во изолација. Во основните училишта има 8 позитивни наставници и 3 паралелки во изолација, а во средните училишта 8 позитивни професори.
А.С
