Во изминатите 11 месеци од оваа година на подрачјето на Секторот за внатрешни работи Тетово биле откриени и санкционирани вкупно 2101 лице од кои во Тетовско 1545 и во Гостиварско 556 кои ги управувале возилата без положен возачки испит и валидна дозвола за тоа или 290 лица повеќе во споредба со цела 2020 година.
Најголемиот број од санкционираните управувале патнички моторни возила или мотоцикли, а биле на возраст од 16 до 35 години. На сите им се изготвени соодветни поднесоци и ќе се соочат со парична глоба од 250 евра во денарска противвредност, а толкава глоба ги очекува и сопствениците на возилата кои им ги дале на управување, иако знаеле дека немаат возачки дозволи.
-Секторот за внатрешни работи Тетово продолжува со континуираните контроли во рамките на кои посебно внимание и се посветува на оваа категорија учесници во сообраќајот и уште еднаш апелира, посебно до младите, да не седнуваат зад волан без положен возачки испит, со што ја доведуваат во ризик сопствената и безбедноста на другите учесници во сообраќајот, информира Марјан Јосифоски, портпарол на СВР Тетово.
Секторот за внатрешни работи Тетово со апел и до родителите и роднините на малолетници да не им овозможуваат управување на нивните возила, зашто на тој начин придонесуваат за нарушување на вкупната сообраќајна безбедност на подрачјето и пошироко.
